Il spetacul promovût dal Teatri Stabil Furlan si ispire al libri “Tutte le anime del mio corpo. Diario di una giovane partigiana”, che al presente il ritrat di une zovine, Maria Antonietta Moro, impegnade prime tes ativitâts dai grups antifassiscj jugoslâfs e daspò te Resistence taliane.
La zovine, tai mês cuant che e je obleade a platâsi, e scrîf un diari. Il document al ven cjatât de fie dome daspò muarte sô mari. A son pagjinis scritis in timp di vuere, che a pandin in maniere sclete lis impressions e i sintiments di une zovine combatente.
Ancje se si indrece a un public gjeneralist adult, il lavôr si è metût come obietîf chel di stiçâ l’interès dai zovins. Par fâlu e je stade fate une sielte stilistiche minimaliste: nuie senis, nuie costums, nuie azion, nuie che al puedi riclamâ cualchi sensazion vintage o retrò te metodiche estetiche de esecuzion. Protagonistis assoludis de sene a son la vôs, la musiche e la imagjinazion.